У панядзелак у Вячэрняй радзе сябра КР Мікіта Салавей адказваў на пытанні гледачоў аб пандэміі, а таксама прэзентаваў новы праект Рупар COVIDa. Чытайце ніжэй галоўнае з таго, што казаў Мікіта Салавей.
Аб масках
– Шкода масак – гэта міф. Апублікаваная вялікая колькасць даследаванняў пра тое, што своечасовае ўвядзенне масачнага рэжыму можа істотна паўплываць на распаўсюджанасць COVID-19 у папуляцыі. Чым больш людзей прытрымліваецца прынцыпаў выкарыстання індывідуальных сродкаў абароны органаў дыхання, тым вышэйшая іх эфектыўнасць і меншая распаўсюджанасць інфекцыі.
Аб даверы да рэкамендацый СААЗ
– Зразумела, што грамадзяне краіны могуць прымаць ці не прымаць рэкамендацыі СААЗ. Але існуюць сітуацыі, калі выкарыстанне рэкамендацый прапісана ў нарматыўных дакументах, і яно становіцца абавязковым да выканання. Як, напрыклад, увядзенне масачнага рэжыму. Тут вядзецца нават не пра абарону самога чалавека, але пра абарону іншых асоб.
Пра недахопы сістэмы аховы здароўя
– Вельмі часта сістэме аховы здароўя бракуе адкрытасці: адкрытасць, прызнанне наяўных праблем дазваляюць пачаць іх вырашаць. Калі мы думаем, што ў нас усё вельмі добра, то мы не бачым, да чаго трэба імкнуцца.
Аб розніцы працякання COVID-19
– Нават калі захворваюць члены адной сям’і, хтосьці можа тэмпературыць 7-14 дзён, а хтосьці наогул без тэмпературы. Залежнасці паміж працягласцю тэмпературы і цяжкасцю стану пацыентаў няма. Рэкамендацыя для ўсіх тут адна: працягваць шмат піць і выкарыстоўваць гарачкапаніжальныя прэпараты, асабліва калі сатурацыя застаецца стабільнай.
Аб дыягностыцы
– У Беларусі выкарыстоўваюцца чатыры асноўныя метады: выяўленне антыгену віруса ў рэспіраторных змывах; палімеразная ланцуговая рэакцыя (ПЛР) у рэспіраторных змывах; выяўленне антыцелаў да віруса ў крыві; камп’ютарная тамаграфія лёгкіх (КТ). Усе гэтыя метады выкарыстоўваюцца на розных стадыях інфекцыі.
Аб вакцынацыі
– Калі казаць пра каранавірусную вакцыну, то пра доступ беларусаў да яе казаць рана. Расія паабяцала, што мы будзем адной з першых краін, дзе яна пачне прымяняцца. Чым небяспечная расійская вакцына? Па «Спутнику 5» працягваюцца клінічныя даследаванні. Меркаваць аб бяспецы можна будзе па выніках гэтых даследаванняў. Пакуль па ніводнай з распрацаваных вакцынаў, уключаючы ЗША і Еўропу, няма вынікаў даследаванняў іх клінічнай бяспекі.
Пра важнасць салідарнасці
– Мы звяртаемся да медыцынскіх работнікаў і нашага неймавернага насельніцтва: дапамажыце адно аднаму! Цяпер як ніколі важныя яднанне і супрацоўніцтва медыцынскіх работнікаў і пацыентаў, каб выстаяць перад нашым агульным ворагам – каранавірусам SARS-CoV-2.
Аб медработніках
– Мае калегі на сённяшні дзень робяць усё магчымае, каб дапамагаць сваім пацыентам. Сёння медыкі знаходзяцца пад уздзеяннем цэлага шэрагу фізічных і псіхалагічных фактараў. Многія працуюць без выходных і адпачынкаў з сакавіка.
